10:54 dinsdag , augustus 14 2018
Home / Column / Column van Henri Wierth

Column van Henri Wierth

Hail dunne droadjes

Zo nou en din heur je op radio of is der n mitdailen op tillevizie dat ter aargens n stroomstören west het.

De mensen zitten din n poar uur of meer zunder elektries en dat geft n bult gedou.

Wat binnen wie zunder stroom?

Ons kachel brandt nait meer, de wasmesien wil nait meer draaien, net as de waskedreuger.

Wel elektries kookt zel zok op zo’n dag redden mouten met brood. Gaskokers hebben din gelok, omreden as t eten in de koulkast en de daipvraizer nog nait deu is, kin t nog bruukt worden.

Koffie en thee zetten is veur n aantal din ook n perbleem, want de wotterkoker en en t koffiezetapperoat waigern dainst.

Om kört te goan: d’haile huusholden zit op zien gat.

En din heb ik t nog nait over aal dij febrieken, zaikenhuzen,  waarkploatsen en boerderijen woar t mis gaait.

Noa zo’n dag van stroomuutval lees je din d’aander dag in de kraande dat t de ekenomie n bult geld köst het. Voak lopt dat in de miljounen.

Joa, de mederne tied geft soms grode perblemen!

Vrouger was dat wel aans.

Mien opoe haar n kookkachel woardat ze törf in stookde. As de törf op was huil ze nije of luit ze de törfboer komen. Dou wie in d’oorlogstied gain stroom haren, stookde ze n duveltje, n lutje kaggeltje, met ofvalhaide van de bezzembinder om t eten te koken.

Ook t verwarmen van t huus ging mit n kachel, woar törf, baggels en aaierkolen in stookt werden.

Elk huus haar n kelder, woar de etenswaren lange tied goud bleven. En n daipvriezer was nait neudzoakelk, want in dijzulfde kelder stonden de sniebonenpot, de zuurkoolpot en de zuldebonenpot bruierlek noast kander.

Op moandag was t waskedag. Op zundagoavend kwam de kookpot aan en d’haile nacht wer de waske uutkookt, zodat moeke, of as je t betoalen konden de waskevraauw, op moandagmörn al op tied achter de wasketobbe ston om mit n bounder en n waskebret de voele klaaier weer schoon te kriegen.

Dreugen deden ze t nadde waskegoud op de liene in toene en bie regenweer op lientjes op zolder, omreden n waskdreuger haar we nait.

t Was haard waarken en je werden der slim muide van, mor t kwam aal goud.

En nou as t elektries uutvaalt staait d’haile moatschoappij stil en lieden wie ekenomische schoade.

Dij stroom komt bie ons en de bedrieven binnen deur lutje dunne droadjes. As n  poar van dij  droadjes knappen is t doan mit t gemak en de bedrieveghaid.

Soms vroag je joe wel ais òf of ale veuruutgang wel n verbetern is. Of bin ik nou zo’n olde zoesklöt, dij maint dat vrouger alles beter was?

Henri Wierth

Controleer ook

Column van Eltje Doddema – Winter

Winter De zummer haar van t joar tot aan september nait aal te veul om …

error: Content is protected !!