22:02 vrijdag , februari 22 2019
Home / Column / Ans Klok / Kerst column van Ans Klok

Kerst column van Ans Klok

Bel me niet………….

Hoe bliede wa’k toen het ‘bel-me-niet-register’ der was. Alles even inspreken, zes weken waachten en dan gien tillefoonties meer van meinsen die mij niet iens in de ogen durft te kieken umdat ze, volgens heur, zo’n geweldig anbod veur mij hebt. “Ik mag u….”en dan kriej een hiel verhael waoraj niet op zit te waachten. Het brutaolste van die lui vun ik nog dat ze mij dan ook nog dudelijk wolden maeken da’k een dief van mien eigen protemonnee waar as ik niet op heur anbod ingung.

Het meuk mijzölf ook brutaol um dan as antwoord te geven: “Dat kan mij niks schelen, ik heb geld zat.”

Eindelijk wa’k daor of. Mooi rustig, benaem onder ’t eten ’s aovends.

Maor dat ha’k edaacht. Want sinds het ‘bel-me-niet-register’ der is, kriej het volk weer an de deure.

Vertegenwoordigers van energiemaatschappijen bijveurbeeld die oe mit heur mooie praoties over wilt haelen um over te stappen, ie kunt volgens heur veule goedkoper.

Maor het alleraargste vien ik nog die studenten die, um een zakcentie bij te verdienen, op zaoterdag um zes ure ’s aovends mit klaegende verhaelen koomt over kienderties in verre laanden die het zo aarm hebt. Over kienderties die in butenlaandse ziekenhuzen niet die zorg kriegt die ze neudig bint of niet dat onderwies kunt kriegen wat zo belangriek is.

Nou steun ik verscheiden doelen die ik belangriek viene en ook de collectes, de miesten die bij oens mit een busse loopt ken ik wel, bint bij mij welkom. Maor die studenten! Ik heb daor körte metten mit. Ik zegge ze, veurdat ze an heur verhael begont dat ze meraekel in overtreding bint en dat het ze, as ik ter waark van maeke, toch gauw zo’n vierhonderd euro giet kosten. De mieste jongelui kiekt mij dan even vrömd an en snapt, al hoe pienter ze in de collegebaanken ook bint, mij absoluut niet. Ik vertelle heur dan da’k in het ‘bel-me-niet-register’ stao en dat mij bellen dus niet mag. Ook niet an de deure bellen. Dan is ’t mis veur heur maor ofedaone veur mij. Gien gezeur en de deure, a’k wat wil steunen of kopen kan ‘k dat zölf wel regeln zunder dat aandern mij lastig valt deur op te bellen of an te bellen.

Maor, deink ik bij mijzölf: as ter nou volgende weke ies een man mit een hoogzwangere vrouw anbelt die mij vertelt dat ze gien stee hebt en zij möt bevallen…… zul ik ter dan ook waark van maeken ? Ik deinke da’k ze binnenlaote en dan zölf 112 gao bellen. Want het Karstkiend kan zomaor binnenvallen en dat is netuurlijk van harte welkom.

Controleer ook

Kerst column van Gerdina

Karstballen. Ok dit jaor weer de ballen van zolder haalt um de boom op te …

error: Content is protected !!