22:03 vrijdag , februari 22 2019
Home / Column / kerst column van Henri Wierth

kerst column van Henri Wierth

Kerstoverdenken 
De dag dat Sunterkloas weerom raisde noar Spanje, was mien buurvrouw al in de weer mit heur kerstboom. Zai het ter n tradietsie van moakt om op 6 dezember mit de kersttied te begunnen. Doar is netuurlek niks mis mit, mor de peperneuten binnen nog mor net in d’aanbaiden of d’eerste kerststollen liggen al weer op n in t oog vallend stee in de supermaark.Dezember is dus de moand van veul en lekker eten en van wat kilo’s aan t lichoamsgewicht touvougen.Toch is in oorsprong t kerstmis n feest dat veuraal gaait over aarme mensen. Dij gedwongen aan de raaize mouten, gain stee vinden om te sloapen en doarom mor overnachten in n staal tussen de daaier. Tot overmoat van ramp kriegen ze op dat moment n kind en kommen der n stel herders langs omdat dij mainen dat dat kind de wereld verlözen zel van ale ellende dij de mensen in de wereld ondergoan mouten: onderdrukken, aarmoude, zaiktes en wat joe nog meer overkommen kin.Gain feest dus mit lichtjes, verskes en lekker dikkedakken.Dat moaken wie der in onze westerse wereld van, want kerstdoagen binnen de doagen dat je biemekoar kommen en meugelk noadenken hou goud wie t wel hebben. Mor din gaait t wel over onszulf en nait over de mensen dij op stroade leven mouten en gain onderdak hebben. Want ook in onze tied van overvloud binnen hier ook lu dij t stoer hebben en hopen dat de voedselbaank heur nog n extroatje oplevern zel.Mensen dij geleuveg binnen vieren t kerstfeest nog zo’n beetje as t bedould is. Zai goan noar de kerke en doun noa de kerstpreek wat extroa’s in t kerkbuultje veur de lu dij t wat minder hebben. Zai dinken ook noa over de geboorte van dat kind dat ale ellende van de wereld op zuk nemen zel.Mor t grootste dail van de mensen stuurt mekoar kerstkoartjes mit hertjes, sleechies, kerstklokken, looikes mit rendaaier, kerstkirreltjes en n bult snij. De moderne kerstlaidjes op de radio binnen Engelstoalege verskes over herten mit rode neuzen, White Christmas van Bing Crosby en gezelleg biemekoar wezen en lekker eten.Woar binnen op radio de olderwetse kerstlaidjes bleven? De herdertjes lagen bij nachteMidden in de winternacht en Er is een kindeke geboren op aard.  Joa, Stille Nacht wil nog wel ais langskommen, want dij heurt ter aaltied bie.Nou ik dit noalees, klinkt het wel slim belerend. Asof ik n hoar beter bin. Nee dus!Uteroard staait bie mie ook n kerstboom mit lampkes en kommen op ain van de kerstdoagen de kinder en klaainkinder om soamen te wezen en lekker te eten. Ik stuur ook kerstgroutnis mit snij, hertjes en kerstmannechies, mor toch denk ik elke moal weer aan aal dij ellende in de wereld dij in twijdoezend joar Christendom nog aal nait oplöst is. En hou zit dat din mit aal dij aander godsdainsten? Hebben dij t din aalmoal bie verkeerde ende?En nou komt doar ook nog t klimoatvroagstok bie. Wat dou we doar aan? Vroagen en perblemen, hou lös we ze op
Ik wens joe schiere kerstdoagenen veur n week loater: Veul zegen in t nijjoar.

Controleer ook

Kerst column van Gerdina

Karstballen. Ok dit jaor weer de ballen van zolder haalt um de boom op te …

error: Content is protected !!