18:20 donderdag , april 18 2019
Breaking News
Home / Column / Kerst column van Nina Werkman

Kerst column van Nina Werkman

HEMEL BOVEN OOSTERWEG

Dij oavend zat ik in n schoullokoal, aal grootgruid toch, en zag –
mit lichten aan – allinneg toavels, wanden, en nog wat teksten aan hoaken, inroamd, aandermans toal. En tegenaan de roet n poar gezichten, as inroamd ook, aandermans beeld. En nog miezulf en hou of ze mie zain.
Koaders van spaigel en van kapper, van dat wat pazend is en dat
wat nait. Denken bie nijs van kraant en van TV en waitenschop, en stoere stukken veur toneel en bouken, laifst vrumd in sproak en schrift, wat swoar op moag ligt van doar t over gaait. En jeugd en laifde en mien aigen woorden. Ach, aal mien woorden en hou
of ze mie zain.

En zag – mit lichten oet – hou klain of roemte was en ook hou groter, veul groter as de schien van laampen, en houken recht om roamen tou, doarlangs t swaart van koale takken op zien gemak tot aan verdaipen rakt. En hou of t zicht verduustert en verroemt en minder tou- of aan-, meer schaauwen wordt, noar dichter in
en wieder oet. En dou, deraan veurbie, hemel boven Oosterweg.

(De stilte in dat schoullokoal, dij mit t opsteken van de wazzen lichtjes, ain veur ain, allain mor stiller wuir, n genöt veur t oor. Net as veur t oog t donker, al in zukzulf vergroot en nou van onderòf met keerskes, ain veur ain en soamen meer as ain bie aine teld. Hou t ook nog duuster bleef en aaid nog hemel boven Oosterweg.)

En zag t ol pad zuk vougen noar de grens van wat begoanboar was. En noar de lienen tussen maart en klooster, lienen van ainvoud op raande van t bestoan. Kraben en knooien, d’olden, langs Oosterweg, deurgoan en ook mie veurgoan – zeg – doezend joar. En ik heur noa. En ik dij in heur toenen woon en main dat ik veur aanswat aanlegd bin as kool en bonen. En ik
mit mien – zeg – sesteg joar en hou of ze mie zain.

Dij oavend zo te zitten in dat schoullokoal – mit lichten oet – en mie te vroagen noar de zin. Van waiten loaten wat ik vuil en vind en haardop denken bie wat aiweg is. Woar ik mie nou zo drok om moak. Hou ze mie zain. Ach, hou of ze mie zain. Terwiel dat veur – zeg – doezend joar dij hemel hier in t roam de hemel was boven Oosterweg en dat over – zeg – doezend joar aaltied nog weden zel.

© NinaWerkman

Controleer ook

Kerst column van Tonko Ufkes

n Kerstoavend De dag wil niet goed op gaang kommen. Wat verdwoasd scharrelt Johannes deur …

error: Content is protected !!