18:51 donderdag , april 18 2019
Breaking News
Home / Column / Kerst column van Reinder van der Molen

Kerst column van Reinder van der Molen

Tieden

Dik twijdoezend joar leden was der n bult volk op pad. Zai gingen terug noar heur geboortestee. Dat mos van n man dij wiedweg ien n grode stad woonde en hom heur kaaizer nuimde. Hai wol dat zai heur ienschrieven laiten zodat e wis wel ien zien riek touhil.

Vandoag de dag binnen der weer veul minsen op rais. Nait veur even. En nait terug noar t verleden mor noar n nije toukomst. Nait omdat n machtege man dat wil – hai wil dat hailddaal nait – mor omdat zai over zien laand dreumen, dreumen over n laand van melk en hunneg.

Doudestieds nuigden hoog ien lucht stroalende engels aarme hedders noar n waarme staal en gingen wieze mannen oet t Oosten achter n glinsternde steern heer. Altmoal op zuik noar t kiend van belofte.

In dizze tied moakt t beeld van vrijhaid, dat vanoet zee as n lichtengel mit n laange fakkel ien haand nije gasten welkom haaitte, gramniedeg t taiken van ho. De laange riegen van steerns op vlag van dij blaikhoarege president stroalen nait meer.

Volk oet tied van dou, dat noa de registroatie nait noar hoes terug wol, verspraaidde heur overaal in dat immense riek. Minsen van nou, groot en klain, dij heur ien t ‘land of the free’ geern ienschrieven loaten willen veur schoul en waark, kommen dat machtege riek nait ien, lopen mit kop tegen haarde en hoge muur.

Tieden binnen der nait beder op worren.

Reinder van der Molen, Azzen

Controleer ook

Kerst column van Tonko Ufkes

n Kerstoavend De dag wil niet goed op gaang kommen. Wat verdwoasd scharrelt Johannes deur …

error: Content is protected !!