21:48 vrijdag , februari 22 2019
Home / Column / kerst column van Tineke Boersma

kerst column van Tineke Boersma

Oh denneboom, oh denneboom

De kerstdoagen stoan weer veur deure en noatuurlek mag n kerstbome din nait ontbreken.
Al joaren hebben wie n kunstbome. Nait omdat wie dij mooier vinden mor uut pure noodzoak den wie hebben katten.

Toun onze katten nog klaain en slim speuls waren zat Jerry onze koater voak ais boven in bome.
Mainsttied was e eerst wat aant speulen en kon inains hail slim riddel int gat kriegen en vloog as n vuurpiele op
kerstbome òf.
Hai schraabte aan stam gaauw zien noagels en nam n roam noar boven. Bome ston din hailendaal te trillen en
des te hoger Jerry klom des te beweegelker wui dij bome.
Ook versieren begon doardeur uut bome te vaaln en hier en doar vloog deur zien baldoadeghaid n kerstbale aan diggels.
Ik was aaltied blied as e endelk boven in bome aankommen was.
Je zagen wat takkies bewegen en sums mit wat engelnhoar op kop kwam e din teveurschien en keek wat onneuzel om
zug tou.
Boven in bome bleef e din voak n zetje en sprong zo vanuut bome op grode toavel.
Sums nam hai in zien sprong t toavelklaaid mit en glee zo mit klaaid en aal over toavel hìn en kwam op raande tot
stilstaand.
Hai keek din wat om zug tou,wos zug over snoet, sprong op vìnsterbaanke en ging of der niks gebeurd was…sloapen.
En ik…ik kwam bie van n haartverzakken en ruumde zien ravoage op.

Mor t was nait allain mien aigen kadde dij mit kerstdoagen mie t leven stoer muik. Nee…doar was ook nog Tommie, kadde
van onze buren. Tommie was Jerry zien vrund en kwam voak ais deur kaddeloekie bie ons noar binnen en vrat n hapke mit.
Onze buren waren veul lozer wèst as ons en haren al n kunstbome kocht.Dus dij haren gain last meer van heur kadde.
Dij lasten haren wie der nou bie.
Tommie haar noamlek ain rötgewoonte. Hai kwam din bie ons binnen en luip regelrecht noar onze kerstbome,rook even aan
dij takkies, draaide zug omme en dee zien steert omhoog. Zien steert ging wat trillen en hai meeg din zo recht achteruut
tegen kerstbome aan en luip zo weer zunder om te kieken noar boeten.
Mor….t kon nog aarger en dat dee ons ook votdoadelk besluten om n kunstbome te kopen, n bome dij tegen weer,
wind en….katten kon.
Wie besloten dat op eerste kerstdag toun Jerry deur koamer achter Tommie aanjuig en mit zien poten achter koabel van
kerstboomlaampkes hoaken bleef. Jerry trok doardeur kerstbome ondersteboven en alles wat der in zat vuil aan diggeln.
Onze bome van sikkom twij meter lag dwaars deur koamer. Honderd laampkes en ale balen, engeltjes, vogeltjes en wat
der nog meer in hong lag aan diggels verspraaid deur koamer.
Katten waren zo slim schrokken dat dij schoten noar boven en luiten zug eerste uren nait weer zain.
Haile middag waren mien man en ik aant oprumen en wuien t der overains dat hier volgend joar ook mor n kunstbome
kommen mos.
Twijde kerstdag zaten wie mit ons baaiden in koamer en keken nait noar n mooie optuugde kerstbome mor noar n onneuzel
kerststukkie. Dij was al in zo’n stoat, dat as je der te stief noar keken naalden der spontoan òfvlogen.

t Joar der op ston bie ons in koamer n kunstbome en wie hebben toun n haile rustege kerst had.
Gain geklim, gain schraberij van noagels, gain diggels en gain gemieg tegen bome aan.

Tineke Boersema

Controleer ook

Kerst column van Tonko Ufkes

n Kerstoavend De dag wil niet goed op gaang kommen. Wat verdwoasd scharrelt Johannes deur …

error: Content is protected !!